Bismillahi Raxmaani Raxiim.

Dhammaan dadka reer Puntland ee sharafta badan meel kasta oo ay jogaan, Mudaneyaal iyo Marwooyin, waad salaaman tihiin. Magacaygu waa Amb. Axmed Ciise Cawad waxaana ahay Musharaxa Madaxweynaha Puntland Doorashada 2024. Waxaa farxad iyo sharaf ii ah in aan maanta idinla wadaago farriintayda murashaxnimo.

Walaayaal muddo shan iyo labaatan (25) sanno ah ka dib, Puntland waxay gashay bog cusub waxaana lagama maarmaan ah in la helo isbedel dhab ah, hogaamin wanaagsan iyo siyaasad cusub, si aan u helno Puntland cusub, taasoo ay hagayso aragti cusub, howlgal iyo hiraal durugsan, si aan horumar dhab ah u gaarsiino dadkeenna iyo dalkeenna ulana jaanqaadno dunida kale ee horusocodka ah. Dhanka kalena waxaa nagu weyn in aan soo saarno jiil cusub oo leh ilbaxnimo, han iyo himilo durugsan, si aan jiilka soo socda aan ugu sameyno dhaxal wanaagsan iyo horumar u dhiganta midda bulshooyinka casriga ah.

Mudaneyaal iyo Marwooyin, waxaan u nimid in aan Puntland ka taabba galino nidaam dowladnimo oo rasmi ah, kaasoo ku salaysan hogaamin wanaagsan, oo ay tiir dhexaad u tahay, maamul wanaag ku qotoma sarreynta sharciga, daahfurnaan iyo isla xisaabtan dhab ah.

Waxaa naga go’an in aan Puntland ka taabba galino hogaamin wanaag, kaasoo salka ku haya siddeedda tiir ee Maamul wanaagga casriga ah iyo in la yagleelo hey’ado dowladeed oo firfircoon, isla xisaabtanna leh, taasoo ah nidaamka ugu wanaagsan uguna habboon in lagu hormariyo kobaca siyaasadeed, bulsho iyo dhaqaale ee Muwaadiniinta reer Puntland.

Dadaal dheer ka dib, Puntland waxay soo gaartay meel u baahan in aan samaynno laba kaclayn dhab ah, si aan ugu talaabsato horumar dhinac walba ah, waxaa dhab ah in Puntland – iyo Soomaaliya guud ahaanba – ay jiraan dib u dhacyo weyn oo ka dhashay hoggaan xumo keentay horumar la’aan iyo fashil siyaasadeed, taasoo ay saldhig u tahay hoggaan xumo ku salaysan xukunka hal qof oo kaliya “one-man rule” oo u fududaysa ku tagri falid awoodeed, musuqmaasuq baahsan iyo in ay meesha ka baxaan hay’ado isu dheelitiran oo is kor joogteeya isna saxa, taasoo markiiba sababta in ay lunto kalsoonidii lagu qabay dowladnimada.

Mudaneyaal iyo Marwooyin, waxaa naga go’an in aan wax weyn ka beddelno qaabkii hore ee loo shaqayn jiray, waxaa na hagaysa aragti cusub taasoo salka ku haysa hoggaamin dhab ah iyo in ay dadweynuhu helaan adeeg hufan oo tayadiisu sarreyso, qof walba iyo xafiis walbana lagu qiimeeyo wax qabadkiisa, ayna jiri doonto is kormeerid, is qiimeyn iyo isla xisaabtan joogta ah.

Hadafka iyo yoolka ugu weyn ee na hagaya waa in aan aragno Puntland oo horumarsan, noqota tusaale wanaagsan, korna u qaadda tayada nolosha bulshadeeda.

Si aan taas uga dhabayno waxaan jecelnahay inaan afartaan tiir ee soo socda udub-dhexaad uga dhigno halku-dhaggayaga “Maamul Wanaag iyo Dimuqraadiyad dhab ah ”.

Musharax Madaxweyne